ଆଜି ସକାଳୁ ଢେଙ୍କାନାଳ ଜିଲ୍ଲା ମହାବୀରରୋଡ ଥାନା ଭେଜିଆ ଛକରେ ଘଟିଛି ମର୍ମନ୍ତୁଦ ସଡକ ଦୁର୍ଘଟଣା । ପିକ୍ନିକ୍ ବସ୍ ସହ ଟ୍ରେଲର ଓ ହାଇୱା ଧକ୍କା ହେବା ଫଳରେ ୪୦ଜଣ ଆହତ ହୋଇଛନ୍ତି ଏବଂ ସେମାନଙ୍କ ମଧ୍ୟରୁ ୫ ଜଣ ଯାତ୍ରୀଙ୍କ ଅବସ୍ଥା ସଙ୍କଟାପନ୍ନ ରହିଛି । ଆହତ ସମସ୍ତଙ୍କୁ ତାଳଚେରସ୍ଥିତ ମଣ୍ଡାପାଳ ହସ୍ପିଟାଲରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ ‘ନିରୂପମା’ ନାମକ ଏକ ପିକନିକ ବସ୍ ଆଜି ସକାଳେ ସମ୍ବଲପୁରରୁ ବଡ଼ଚଣା ଅଞ୍ଚଳକୁ ଫେରୁଥିଲା । ଏହି ବସ୍ରେ ପ୍ରାୟ ୪୦ ଜଣ ଯାତ୍ରୀ ଥିଲେ। କିନ୍ତୁ ଦୁର୍ଭାଗ୍ୟବଶତଃ ମହାବୀରରୋଡ ଥାନା ଭେଜିଆ ଛକରେ ପ୍ରଥମେ ଏକ ହାଇୱା ସହ ବସ୍ର ଧକ୍କା ହୋଇଥିଲା । ଏହାପରେ ଦ୍ରୁତ ଗତିରେ ଅନ୍ୟପଟେ ଆସୁଥିବା ଆଉ ଏକ ଟ୍ରକ୍ ବସ୍କୁ ପିଟିଥିଲା। ତୁରନ୍ତ ଖବର ପାଇ ସ୍ଥାନୀୟ ଲୋକେ ଓ ମହାବିରୋଡ଼ ପୋଲିସ ଘଟଣାସ୍ଥଳରେ ପହଞ୍ଚିଥିଲେ । ଏହାପରେ ବସ୍ରୁ ସମସ୍ତ ଯାତ୍ରୀଙ୍କୁ ଉଦ୍ଧାର କରାଯାଇ ତାଳଚେର ସ୍ଥିତ ମଣ୍ଡାପାଳ ହସ୍ପିଟାଲରେ ଭର୍ତ୍ତି କରାଯାଇଛି। ସେମାନଙ୍କ ମଧ୍ୟରୁ ହାଇୱା ଡ୍ରାଇଭରଙ୍କ ସମେତ ୫ ଜଣଙ୍କ ଅବସ୍ଥା ଗୁରୁତର ଥିବା ଜଣାପଡିଛି ।
